Ван 'т Схип: 12 күнде төрт матч ойнауымыз керек

14 қыркүйекте жарияланған 28 футболшыдан тұратын құрам жиынның алғашқы күнін өткізді. Бапкердің айтуынша, ойыншылар клубтық матчтардан кейін жиналғандықтан, жаттығу жеңіл әрі қалпына келтіру сипатында болды.

«Кеше жиынның алғашқы күні болды, ойыншылар өз матчтарынан кейін келді. Сондықтан біз аяқтағы кернеу мен ауырлықты басу үшін өте тыныш, қалпына келтіру жаттығуын өткіздік», — деді ван 'т Схип.

Бапкердің сөзінше, командадағы көңіл-күй жақсы. «Энергия жақсы, атмосфера жақсы. Бүгін екінші жаттығу, мен қазір осында жүрген барлық ойыншымен жеке сөйлестім, әрқайсысымен шамамен 10 минуттан», — деді ол.

Құрама Ұлттар лигасының күзгі циклінде төрт матч өткізеді. 26 қыркүйекте Фарер аралдарына қарсы қонақта ойнайтын қазақстандықтар 29 қыркүйекте Словакиямен де сырт алаңда кездеседі. 2 қазанда Молдованы қабылдайтын құрама 6 қазанда Фарер аралдарымен жауап матчын өткізеді.

«Қарсыластар туралы айтсақ, әрине, Словакия — фаворит, біз мұны білеміз. ФИФА рейтингіне қарасақ та жеткілікті», — деді бапкер. Оның сөзінше, Фарер аралдарына қарсы алғашқы ойын да маңызды болмақ: «Ұзақ жол, сырт алаңдағы матч. Содан кейін Словакияға сапар».

Ван 'т Схип төрт матчтың тығыз кестеде өтетінін атап өтті: «Фарермен матчтан 6 қазанға дейін небәрі 12 күн бар, осы аралықта төрт ойын өткізуіміз керек».

Қақпашы Стас команда жиынына дүйсенбі күні қосылады.