ҚФФ төрешіге ықпал ету әрекетін анықтап, оны мерзімсіз шеттетті

«ҚФФ-те төрешілердің біріне заңсыз ықпал ету әрекеті жасалғаны туралы мәлімет бар. Қолда бар ақпарат пен мән-жайларды қарау нәтижесінде ҚФФ аталған төрешіні футбол жарыстарына қатысудан мерзімсіз шеттету туралы шешім қабылдады», — делінген федерация хабарламасында.

Шеттетілген төрешінің есімі жарияланған жоқ.

Федерацияның айтуынша, футбол жарыстарына қатысушыларға қысым көрсету және өзге де заңсыз ықпал ету әрекеттері туралы ақпаратты жинау мен талдау жұмысы жалғасады.

«Федерация спорттық нәтижеге кез келген манипуляция жасау әрекетіне нөлдік төзімділік танытады», — деді ҚФФ өкілдері.

Сонымен қатар федерация спорттық жарыстарды манипуляциялағаны үшін жауапкершілікті күшейтуге бағытталған заңнаманы жетілдіру жұмысын бастауды жоспарлап отыр.