«Қайсар» қақпашысы Ковач: Словакия жеңеді деп сенемін, бірақ Вайсс жетекшілігіндегі құрама мықты болады

«Бұл жеңіл ойын болмайды, бірақ мен Словакияның жеңісіне сенемін. Бізде осы топта бірінші орын алуға деген үлкен амбиция бар, өз алаңымыздың артықшылығы бізге көп көмектеседі деп ойлаймын», — деді Ковач.

Оның айтуынша, екі елдің футбол стилі айтарлықтай ерекшеленеді: «Словакия футболы тактикалық жағынан жақсы құрылған және позициялық ойынға негізделген. Ал қазақстандық футбол — өте динамикалық, жылдам қарсы шабуылдарымен ерекшеленеді».

Словакия құрамасына жаңа бас бапкер ретінде оралған Владимир Вайсс туралы Ковач жылы лебіз білдірді. «Оны Словакияның ең мықты бапкері деп есептеймін — тәжірибелі әрі аса құрметке ие маман. Ол тек нәтижеге жұмыс істейтін футболшыларды ойнатады», — деді ол. Вайсс бұған дейін алматылық «Қайратты» жаттықтырған.

26 жастағы Ковач «Қайсарға» 2026 жылдың қаңтарында тәжікстандық «Вахштан» бос агент мәртебесінде қосылды. Ол ағымдағы маусымда «Қайсар» құрамында барлық турнирде 10 матч өткізді, бұған дейін Кипр, Чехия және Словакия клубтарында ойнаған.

Джон ван 'т Схип жетекшілік ететін Қазақстан құрамасы күзгі кестені 26 қыркүйекте Фарер аралдарымен және 29 қыркүйекте Словакиямен сыртта өтетін матчтармен ашады. Одан кейін 2 қазанда Молдованы, 6 қазанда Фарер аралдарын өз алаңында қарсы алады.