Полиция «Кардифф» ойыншысы Беликтің жанкүйермен қақтығысын тексеріп жатыр

5 қыркүйекте, сенбі күні, «Фраттон Парк» стадионында өткен кездесуде «Портсмут» қонақтағы «Кардиффті» 2:0 есебімен жеңген болатын. Матчтың екінші таймында, шамамен 70-минутта, Белик алаң сыртына шығып кеткен допты алуға барғанда жас жанкүйермен қақтығысып қалған.

Видеоға түскен көріністерде жанкүйер допты алаңға қайта лақтырғаннан кейін Беликтің оны мойнынан итергені көрінеді. Хэмпшир полициясы бұл оқиғаны жасөспірімге қатысты қарапайым дене жарақатын салу фактісі ретінде тергеп жатыр.

«Сенбі күнгі футбол матчында («Фраттон Парк», 5 қыркүйек) жасөспірім жігіттің дене жарақатын алғаны туралы хабарланған оқиғаны тергеп жатырмыз. Тергеу жалғасуда», — делінген полиция мәлімдемесінде.

«Портсмут» клубы да жағдайға қатысты мәлімдеме жасады: «Жастардың амандығы мен қауіпсіздігі — «Портсмут» футбол клубы үшін ең маңызды мәселе. Тергеу барысында тиісті тараптармен байланыста боламыз».

«Кардиффтің» бас бапкері Брайан Барри-Мерфидің айтуынша, Беликтің өзі бетінен шапалақ жеген. «Портсмуттың» бас бапкері Джон Мусиньо қонақ команда алдында кешірім сұрады. Оқиғадан кейін матч біраз уақытқа тоқтатылған.

Белик «Кардиффке» жуырда «Вест Бромнан» ауысқан болатын. «Портсмут» клубы әлеуметтік желідегі болжамдарға сенбеуге шақырып, тергеу нәтижесін күту керектігін атап өтті.