Абагна: қақпашыны алдағым келді, бірақ ол қақпадан шығып кетті

Кездесу 29 тамызда, чемпионаттың 24-турында өтті. Есепті 9-минутта Леонардо Натель Виера ашса, 64-минутта Абагна екінші голды соқты, ал 76-минутта Эвертон Маседо Мораес нүкте қойды.

«Алғашында қақпашыны алдап өткім келді. Бірақ оның қақпадан шығып кеткенін көріп, алыс бұрышқа соғуға мүмкіндік бар екенін түсіндім. Құдайға шүкір, бәрі сәтті болып, доп қақпаға кірді», — деді Абагна.

Ойыншы бұған дейін ұқсас жағдайда сәтсіздікке ұшырағанын да жасырмады: «Қақпашымен бетпе-бет шығатын сәттерді аса ұната бермеймін. Өткен матчта дәл сондай мүмкіндігім болды, бірақ ол кезде гол соға алмадым».

Абагна қарсыласты жеңіл бағаламағанын да атап өтті: «Қарсыласымыз – жақсы команда. Егер 100% күшімізді салмасақ, олардың бізге қиындық тудыра алатынын білдік».

Статистикаға сүйенсек, «Ордабасы» доп иелену үлесінде 53%-бен басым болып, 15 соққы жасады, оның бесеуі дәл нысанаға тиді. «Қызылжар» есебіне 47% доп иелену және 12 соққы (3 дәл соққы) жазылды.