Ыстықтан газон зақымдалды: ПСЖ мен «Реннің» матчы басқа қалаға ауысты

Матч бастапқыда Парижде, «Парк де Пренс» стадионында өтуге тиіс еді. Дегенмен Франция футболының жарыстар жөніндегі комитеті сәрсенбіде кездесуді Реннге көшіру туралы шешім қабылдады. Стадионды ауыстыру мәселесі «Реннмен» келісіліп шешілді.

ПСЖ баспасөз қызметі газонның қазіргі жағдайы матчты қауіпсіз өткізуге мүмкіндік бермейтінін айтты.

«Қазіргі жағдай ойыншылардың қауіпсіздігі мен физикалық жай-күйін ескере отырып, матчты қанағаттанарлық жағдайда өткізуге мүмкіндік бермейді», — делінген клуб мәлімдемесінде.

ПСЖ сондай-ақ жанкүйерлер алдында өкінішін білдірді. «Париж Сен-Жермен» бұл өзгерістің «Парк де Пренстегі» матчқа баруды жоспарлаған жанкүйерлер мен барлық адамдарға тигізетін қолайсыздығын толық түсінеді», — деп жазды клуб, жағдайды төтенше деп бағалап, өкінішін жеткізді.

ПСЖ өз алаңында келесі кездесуін 4 қыркүйекте «Монакомен» өткізеді.