Карпович: Екі 11 метрлік добының біріншісі негізсіз тағайындалды

Кездесудің бірінші таймында «Елимай» екі гол өткізіп алып, демалысқа 0:2 есебімен кетті. Карповичтің айтуынша, бұл екі гол да 11 метрлік айып добынан соғылған.

«Екі пенальти тағайындалғаннан кейін ойынды теңестіру қиын, әрине. Иә, мүмкін, төрешіге өзіміз де себеп бердік. Бірақ бәрібір, менің ойымша, бірінші пенальтиде ешқандай ереже бұзушылық болған жоқ», — деді бапкер.

Екінші таймда «Елимай» ойынын толық қайта құрып, қарсыласынан басым түсті. «Каспийге» деген барлық құрметпен айтарым, екінші таймда оларға ойын көрсетуге мүмкіндік бермедік, басымдық бізде болды, екі гол соқтық», — деп атап өтті Карпович. Ол үзіліс кезінде командаға «қандай жағдайда да берілмеу керек» деген сөзді жеткізгенін де айтты.

Бапкер сондай-ақ «Каспийдің» туған қаласына оралуымен құттықтап, стадиондағы жақсы атмосфераны атап өтті.

Осы ойыннан кейін «Елимай» 21 матчтан кейін 32 ұпаймен ҚПЛ кестесінде 6-орында тұр. «Каспий» 22 матчта 23 ұпай жинап, 10-орында келеді.