«Қайсар» кеңесшісі «Ақтөбе» жанкүйерлерінен нақты сан сұрады

«Қайсар» мен «Ақтөбе» арасындағы кездесу 15 тамызда «Қайсар Арена» стадионында өтеді. Қазіргі турнир кестесінде «Ақтөбе» 32 ұпаймен 5-орында тұр, «Қайсар» 20 ұпаймен 13-орында.

«Қайырлы кеш! Бірден айтайын, бұл бейне қызылордалықтарға емес, ақтөбеліктерге арналған. Білетіндеріңдей, 15 тамызда өтетін «Қайсар» — «Ақтөбе» матчы алдында Ақтөбеден мыңдаған жанкүйер келеді деген ақпарат түсті. Алайда «мыңдаған» дегенмен, бізге нақты сан керек», — деді Қабылша.

Оның айтуынша, Ақтөбеден кемінде 200–300 жанкүйер келеді деген дерек бар. «Сол себепті қазір кемінде 200 адам келеді деп сеніп, біз D1 секторын бөліп отырмыз», — деді ол. D1 секторы шамамен 200 адамға есептелген.

Егер одан да көп, кемінде 500 адам келетін болса, бұл туралы алдын ала хабарлауды өтінді.

«Егер сендер көбірек құраммен келетін болсаңдар, кемінде 500 адам боламыз десеңдер, бұл туралы алдын ала хабарлаңдар», — деді Қабылша.