«Ақтөбе»: Ләсовтың басшылық қызметке тағайындалғаны туралы ақпарат — жалған

Клубтың ресми мәлімдемесінде Ләсов команда құрамындағы ойыншылардың бірінің өкілі ғана екені атап өтілді. Оған клубты басқару лауазымы ешқашан ұсынылмаған.

«Соңғы кезде «Ақтөбе» туралы таралған ақпаратта Әлихан Ләсовтың клуб басшылығына тағайындалғаны айтылады. Бұл ақпарат шындыққа сәйкес келмейді», — делінген клубтың мәлімдемесінде.

Сонымен қатар клуб соңғы уақытта өзі туралы жалған дерек жиі таралатынын мәлімдеді. «Жанкүйерлер мен БАҚ өкілдерін тек ресми ақпаратқа сүйенуге және клубтың беделіне нұқсан келтіретін хабарлардан аулақ болуға шақырамыз», — делінген құжатта.

Клуб сондай-ақ алауыздық тудыру мақсатында жалған ақпарат таратушыларға заң жүзінде жауапкершілік көзделгенін ескертті.