Opta Analyst бағалауынша, Қазақстан премьер-лигасы рейтингте 71-орында

Opta Power Rankings атты бұл рейтинг әлем бойынша 15 мыңнан астам ерлер мен әйелдер командасын қамтиды. Әр команда 0-ден 100-ге дейінгі шкала бойынша бағаланады, ал көрсеткіш ай сайын жаңарып отырады.

Opta Analyst бағалауынша, ҚПЛ Катар (72-орын), Ирландия (73-орын) және Гана (74-орын) чемпионаттарынан жоғары тұр. Ал Бразилияның екінші лигасы (64-орын) мен Германияның үшінші дивизионы (65-орын) қазақстандық лигадан жоғары бағаланған.

ТМД елдері арасында ҚПЛ-дан жоғары тек Ресей (28-орын), Әзербайжан (58-орын) және Украина (61-орын) чемпионаттары тұр. Сарапшылардың бағалауынша, Қазақстан лигасы Өзбекстанның Суперлигасынан 25 позицияға жоғары орналасқан.

Opta мамандарының пікірінше, «Қайраттың» Чемпиондар лигасының жалпы кезеңіне жолдама алуы ҚПЛ рейтингіне айтарлықтай серпін берген.

Рейтингтегі басқа өзгерістер де назар аудартады: Аргентина чемпионаты 10-орыннан 7-орынға көтерілсе, Англияның екінші лигасы, керісінше, 7-орыннан 10-орынға түсіп кеткен.