Алекс Скотт: Борнмуттың тынымсыз жүрегі топ-клубтарды елең еткізіп отыр
Футболда кейде ойыншының құндылығын гол саны емес, оның команда үшін қаншалықты «көрінбейтін» жұмыс атқаратыны айқындайды. Алекс Скотттың тарихы дәл осындай — «Борнмутта» өткен маусымды сенімсіз бастаған жас жартылай қорғаушы бүгінде Ираола құрамасының өзегіне айналды. Ағымдағы маусымда ол 34 матчта негізгі құрамда шықты, бұл — тек Маркос Сенеси мен Адриен Труффеден кейінгі үшінші көрсеткіш. Мұндай тұрақтылық кездейсоқ емес: бапкер оған нақты рөл сеніп тапсырды.
Ираола Скоттың пас ойынын әдейі жеңілдетті — креатор миссиясын Маркус Тавернеге, ал қапталдан ойға беруді Труффеге жүктеді. Скоттың міндеті басқаша: ойын қарқынын ұстап тұру, доп иеленуді сақтау, ал қажет болғанда — қарсыласты доптан айыру. Осы тұрғыда сандар айқын сөйлейді: 90 минутта орташа 11.6 км жүгіру — «Борнмут» құрамасындағы ең жоғары көрсеткіш, ал позицияны қалпына келтіру үшін артқа жасалған 184 жүгіріс — лигадағы ең үздік нәтиже. Бұл сан жай ғана шаршағыштықтың емес, тәртіптің дәлелі.
Қорғаныс фазасында Скотт нақты стандартқа сай ойыншы. 90 минутта 6.1 доп тартып алу — 1000 минуттан астам ойнаған футболшылар арасында 8-орын, ал 38 подкат оған 22 жас және одан төмен жас тобында 5-орынды әперді. Бұл көрсеткіштер Ираоланың топ-клубтарға қарсы қолданатын агрессивті прессинг философиясына тамаша сай келеді. Скотт — дәл сол ойыншы: қарсыласты доптан айырып, шабуылды тоқтата алады.
Бірақ Скотттың құндылығы тек қорғаныспен шектелмейді. 2006 доп жанасуы — 23 жасқа дейінгі ойыншылар арасында 3-орын, ал 1182 дәл пас — сол топта 2-орын. Оның үстіне, ол доппен 90 минутта 68.6 метрге алға жылжиды, ал прогрессивті жүріс саны бойынша 23 жасқа дейінгі жартылай қорғаушылар арасында 5-орында тұр. Осының бәрі оның доппен де, доптан айырылғанда да пайдалы екенін көрсетеді. Тіпті ұтып алған 60 фолі — лигада 5-ші көрсеткіш — оның дриблинг арқылы қарсыласты ережені бұзуға итермелей алатынын дәлелдейді, бұл стандарт жағдайлар кезінде маңызды қару.
Дегенмен, Скотттың портретінде толымсыз тұстар да бар. Маусым бойы небәрі 4 гол және 1 нәтижелі пас — үлкен клубтың креативті ойыншысы үшін тым аз. Ашық ойыннан жасалған сәттер саны да көңіл көншітпейді — 90 минутта небәрі 0.7 сәт. Бұл оның қазіргі рөлінің шектеулі екенін көрсетеді: Скотт — хайлайт жасаушы емес, ол — іргетас қалаушы. «Борнмуттың» қорғанысқа бағытталған стилі оған шабуылда еркін әрекет ету мүмкіндігін көп бермейді, сондықтан оның шынайы шабуылдық әлеуеті әлі ашылған жоқ.
Менің ойымша, дәл осы тұс — Скотт трансферінің ең қызық сәті. Егер ол топ-6 клубына ауысып, Бернарду Силва немесе Матеус Фернандес секілді ойыншылардың қасында ойнаса, оның рөлі күрт өзгеруі мүмкін — қарсылас айыппұл алаңына еніп, гол мен пас санын арттыратын толыққанды жартылай қорғаушыға айналуы ықтимал. Тухель секілді бапкерлердің қолында мұндай физикалық әрі тактикалық тәртібі мықты ойыншы жаңа деңгейге көтерілуі мүмкін. «Челсидің» £64 миллиондық ұсынысы кездейсоқ емес — бұл сома Скотттың әлеуетін, әлі толық ашылмаған мүмкіндігін бағалағанын білдіреді.
Қорытындылай келе, Алекс Скотт — қазіргі АПЛ-дегі ең сирек кездесетін типтегі ойыншы: физикалық ресурсы шексіз, тактикалық тәртібі мінсіз, ал шабуылдық әлеуеті әлі толық ашылмаған box-to-box жартылай қорғаушы. Оны сатып алатын клуб қазір дайын жауынгерді алады, бірақ бір-екі жылдан соң мүлде басқа, әлдеқайда қауіпті ойыншыны көруі мүмкін.
Талдау идеясының дереккөзі: The Analyst (Opta).
