ҚФФ ТКК бірнеше клубқа айыппұл салып, ойыншыларды жарыстан шеттетті

«Ақтөбе» «Алтаймен» кездесуде бес сары карточка алғаны үшін 100 АЕК мөлшерінде айыппұл төлейді. Дәл сондай — 100 АЕК айыппұл «Қаспиге» де салынды: клуб ойыншылары «Қайсармен» матчта бес рет сары карточка көріп, бір ойыншысы алаңнан қуылған.

«Қайсар» өз кезегінде жанкүйерлерінің тәртібі үшін жаза алды — олар «Қаспий» ойыншыларына бөтелке лақтырған.

«Оқжетпес» пен «Жетісу» екінші таймға үш минутқа кешігіп шыққаны үшін 60 АЕК-тен айыппұл төледі. Сонымен қатар «Оқжетпеске» стадионда өрт сөндіру машинасы болмағаны үшін ескерту жасалды.

Жеке ойыншылар да жазасын алды: «Жетісудың» легионері Марко Зиванович дөрекі ойыны үшін екі матчқа ойнаудан шеттетілді. «Алтай» ойыншысы Аликбар Әбілхайыр Кубок жарысының жартылай финалында «Ордабасыға» қарсы төрешілерге дөрекі сөз айтқаны үшін төрт матчқа дисквалификацияланды, жаза мерзімі 16 шілдеден бастап есептеледі.