Әр 16 минут сайын — нәтижелі әрекет: Исмаил Бекболат «Қайраттың» жаңа жұлдызына айналып келеді

Бейсенбіге қараған түні Черногорияның Никшич қаласында өткен кездесуде «Қайрат» жергілікті «Сутьесканы» 2:0 есебімен ұтты. 68-минутта алаңға енді ғана шыққан Исмаил Бекболат қарсылас қақпашысының қателігін пайдаланып, есепті ашты. Ал 83-минутта Жоржиньо айыппұл добынан екінші голды соқты. Алғашқы ойында Алматыда 2:1 есебімен жеңген алматылықтар екі кездесудің қорытындысы бойынша 4:1 есебімен Чемпиондар лигасы іріктеуінің екінші раундына жолдама алды.

Бекболат бұл кезеңде тек голмен шектелген жоқ: 8 шілдедегі алғашқы матчта ол екі голдық пас берген еді. Сөйтіп, жас шабуылшы Чемпиондар лигасындағы алғашқы екі ойынында үш нәтижелі әрекет жасады.

2008 жылғы 10 қаңтарда туған Бекболат — «Қайрат» академиясының түлегі әрі Қазақстанның жасөспірімдер (U-19) құрамасының капитаны. Премьер-лигада ол өткен жылғы наурызда «Астанаға» қарсы матчта дебют жасады.

Оның биылғы маусымдағы көрсеткіштері назар аудартады. Премьер-лигада — 5 матч, барлығында алаңға алмастыру ретінде шықты. Алаңда өткізген 64 минутта 1 гол соғып, 3 голдық пас берді — яғни орта есеппен әр 16 минут сайын бір нәтижелі әрекет. Бірінші лигада «Қайрат Жастар» құрамында биыл 10 матчта 8 гол соғып үлгерді.

«Қайрат» академиясы жақында тағы бір түлегі Дастан Сатпаевты Лондонның «Челси» клубына аттандырған еді. Енді жанкүйерлер академияның келесі жарқын түлегі кім болатынын талқылап жатыр — Бекболаттың көрсеткіштері бұл сұраққа өз жауабын беретін сияқты.