Әр 16 минут сайын — нәтижелі әрекет: Исмаил Бекболат «Қайраттың» жаңа жұлдызына айналып келеді

Бейсенбіге қараған түні Черногорияның Никшич қаласында өткен кездесуде «Қайрат» жергілікті «Сутьесканы» 2:0 есебімен ұтты. 68-минутта алаңға енді ғана шыққан Исмаил Бекболат қарсылас қақпашысының қателігін пайдаланып, есепті ашты. Ал 83-минутта Жоржиньо пенальтиден екінші голды соқты. Алғашқы ойында Алматыда 2:1 жеңген алматылықтар екі матч қорытындысы бойынша 4:1 есебімен Чемпиондар лигасы іріктеуінің екінші раундына жолдама алды.

Бекболат бұл кезеңде тек голмен шектелген жоқ: 8 шілдедегі алғашқы матчта ол екі голдық пас берген еді. Сөйтіп жас шабуылшы Чемпиондар лигасындағы алғашқы екі ойынында үш нәтижелі әрекет жасады.

2008 жылғы 10 қаңтарда туған Бекболат — «Қайрат» академиясының түлегі және Қазақстанның жасөспірімдер (U-19) құрамасының капитаны. Премьер-лигада ол өткен жылғы наурызда «Астанаға» қарсы матчта дебют жасаған.

Оның биылғы маусымдағы сандары назар аудартады. Премьер-лигада — 5 матч, бәрінде алаңға алмастырып шықты. Алаңда өткізген 64 минутта 1 гол соғып, 3 голдық пас берді — яғни орта есеппен әр 16 минут сайын бір нәтижелі әрекет. Бірінші лигада «Қайрат Жастар» құрамында биыл 10 матчта 8 гол соғып үлгерді.

«Қайрат» академиясы жақында тағы бір түлегі Дастан Сатпаевты Лондонның «Челсиіне» аттандырған. Енді жанкүйерлер академияның келесі жарқын түлегі кім болатынын талқылап жатыр — Бекболаттың сандары бұл сұраққа өз жауабын ұсынғандай.