Эллиот Андерсон 116 миллион фунтқа «Манчестер Ситиге» ауысты

23 жастағы ойыншы «Манчестер Сити» құрамымен бес жылдық келісімшартқа қол қойды, оған тағы 12 айға ұзарту опциясы қосылған. Трансфер осы айдың басында келісіліп, Андерсонның әлем чемпионатынан оралуын күтіп, ресми түрде рәсімделген. Ағылшын құрамасы турнирде үшінші орын алған болатын.

«Бұл клубта ойнағанды асыға күтемін. Бұл — трофейлер жеңіп, ойынның ең жоғарғы деңгейінде бәсекелесу үшін құрылған клуб. Бұл кез келген футболшы үшін қуанышты», — деді Андерсон.

«Олар — жеңімпаздар, аяусыз күресетін команда, мен де осындай топтың мүшесі болғым келді. Соңғы 10-12 жылда олар билік құрды, мен де сол себепті осында келдім», — деп қосты ол.

Жартылай қорғаушы 13 қыркүйекте «Олд Траффордта» өтетін Манчестер дербиіне де тілек білдірді: «Бұл — әлемдегі ең үлкен дербилердің бірі, мен Манчестерді білгелі бері «Сити» осы қаланың патшасы болып келеді. Керемет матч болады, мен де сондай оқиғаға қатысқым келеді».

Андерсон өз деңгейіне әлі жетпегенін де жасырмады: «Мен небәрі 23-темін, ең жақсы формама жетуге әлі уақытым бар. Әзірге сол деңгейге жеткен жоқпын, алдымда тағы да көп нәрсе бар».

Еске салайық, Андерсон — «Ньюкаслдың» жастар академиясының түлегі, ол осы клуб үшін 55 матч өткізген, ал «Бристоль Роверсте» жалдамамен ойнаған кезі де болды. Ол «Ноттингем Форестке» екі жыл бұрын 35 миллион фунтқа ауысып, 92 матчта алаңға шыққан. Өткен маусымда ойыншы алғаш рет Англия құрамасына шақыру алды. Айта кетейік, осы жаз Андерсонға «Манчестер Юнайтед» да қызығушылық танытқан болатын.